Ресейдің 2022 жылы Украинаға жасаған кең ауқымды басқыншылығы елдер мен құрлықтар арасындағы жаһандық байланысты ашып көрсетті, олардың өзара тәуелділігін айқындады. Бізден мыңдаған шақырым қашықтықта болып жатқан оқиғалар әсері бойынша алыста емес, жақын жерде болып жатқандай сезіледі. Соғыс екі елде ғана жүріпжатқанына қарамастан, Украинадағы соғыстың жаһандық әсері айқын көрініп отыр. Дегенмен оның салдары бастапқыда бірден байқалмай, бұқаралық ақпарат құралдарында да кеңінен қамтылмады.

Женевадағы Халықаралық гуманитарлық құқық және адам құқықтары академиясы қазіргі уақытта әлем бойынша 110 қарулы қақтығысты бақылауда, ал 2023 жылы Ослодағы бейбітшілікті зерттеу институты соңғы үш жылдың Екінші дүниежүзілік соғыстан кейінгіуақытта ең қатыгез кезең болғанын анықтады. Өлім-жітім ең көп қақтығыстардың қатарында Эфиопияның Тыграй аймағындағы азаматтық соғыс, Ресейдің Украинаға басып кіруі және Газа секторындағы бомбалау бар.

Сандар жеке мәнмәтіннен тыс, өз алдына бейтарап, құрғақ мәлімет ретінде қала бермек. Олар біздің күнделікті өмірімізге тікелей әсер етпейтін оқиғаларға қызығушылық немесе жанашырлық тудыра алмайды. Тек адамдар қақтығыспен бетпе-бет келгенде ғана оның мән-жайын тереңірек түсініп, зиян келтірген немесе адамдардың өліміне алып келген оқиғаларға жауаптыларды анықтауға тырысады. Интернет пен жаңа медиатехнологиялардың пайда болуы бізге кез келген жердегі кез келген тақырып бойынша нақты ақпаратқа қол жеткізуге мүмкіндік беретіндей көрінгенімен, шындықты толық көрсете алмайды. Шексіз ақпарат ағыны "Шын мәнінде не болып жатыр?" деген сұраққа жауап бере алмайды.

«Beyond the Silence» жобасы фотоөнерге билік пен жеке адамдар әрекеттерінің салдарын көрсете алатын, шынайы оқиғаларды суреттеп бере алатын құрал ретінде қарайды. Жоба Украина, Қазақстан, Мексика, Нигерия және Мьянма сияқты бес ел арасындағы байланысты зерттеуге бағытталған. Ол үшін фотографтар арасындағы диалог орнату және ортақ мәселелер туралы әңгімелерін, тәжірибелері мен ой-толғауларын көрсету көзделді. Мәселен, Қазақстанда фотографтар "Аймақ" тұжырымдамасына назар аударып, аумақтық тұтастық, саяси шекаралар мен сәйкестік идеяларын зерттеді. Ал зорлық-зомбылық көптен бері қоғам өмірінің ажырамас бөлігіне айналған Нигерияда күрес пен бейімделу ұғымдарын жеткізетін суреттерді түсіру мақсаты қойылды. Украина мысалында екі тұжырымдама да қарастырылады, себебі соғыс осы мәселелерге қайта қарауға мәжбүр етіп отыр.

«Beyond the Silence» — Magnum Photos және Odesa Photo Days фестивалі (Украина) бірлескен жобасы, ол «Ашық қоғам» қорлары және Украин институтының қолдауымен ұйымдастырылған.